Barruan Santiagori eskainitako irudiak ere badaude. Erromesari, “Pikunittako (herriko baserria) eskolaua” esaten diote Antzuolan. Horrez gain, bertako jaietan ateratzen den kofradeen pitxerra ere interesgarria da, nahiz eta berau maiordomoaren etxean gorde.
Oinplano errektangularra eta bi isurialdeko estalkia dituen eraikina, XVI. mendean eraikia, nahiz eta jatorrizko barne-egituran eraldaketa handiak jasan dituen. Hormak harlangaitzezkoak dira, izkinetan harlanduak dituztela. Arkupeak babesten duen arku dobeladun apur bat zorrotza du sarreran. Estalkiaren egitura zurezkoa da eta harrizko pilastrek eusten diote. Kanpoaldean harrizko kanpai-horma dauka, goian pinakulu bat duena. Barnealdean, burualdeak zurezko hiru aldare dauzka. Erdigunean sainduaren irudia dauka, epistola aldean Santiago eta zaldiaren irudia eta ebanjelio aldean Santa Katalinaren irudia, antzina, ermitako titular izandakoarena. Presbiterioaren goialdean oholezko kanoi erdiko gangatxo modernoa dago, seguruenik aurreko baten ordezkoa edo dena, xehekapen guzti-guztietan hurbil dauden XVI. gizaldiko Bergarako San Kristobal eta Santa Katalina sabaitza imitatzen baitute.
